Si u rikthye familja Berisha në shtëpinë e saj në Zveçan pas 28 vjetësh?

ZVEÇAN — Pas gati tri dekadash pritjeje, familja Berisha ka rikthyer shtëpinë e saj në Zveçan. Ky zhvillim ka ndodhur në kohën e shënimit të 27-vjetorit të Ditës së çlirimit, duke shënuar fundin e një periudhe të gjatë të pamundësisë për të shfrytëzuar pronën e tyre legjitime.

Zana Berisha nga kjo familje ka treguar në emisionin “Sot” në KTV se çlirimi në Mitrovicë dhe në komunat e tjera në veri të vendit ka ardhur më vonë në krahasim me pjesët e tjera. Ajo ka vënë në dukje se për shumë vite, qytetarëve u është pamundësuar kthimi në pronat e tyre.

Pas plot 28 vjetësh pritjeje, familja ka arritur të rikthehet në këtë shtëpi. Zana Berisha ka shpjeguar se kjo pronë mbart një vlerë të jashtëzakonshme për ta, pasi përfaqëson investimin dhe kontributin e shumë brezave të familjes së saj që punuan me vite për ta ndërtuar atë.

Ajo ka deklaruar se është një “kënaqësi shumë, shumë e madhe që pas 28 vjetësh të kthehemi në pronën e familjes”, në pronën që gjyshi i saj e ka blerë dhe ku babai e axhët e saj kanë investuar, duke qenë kjo djersa e tërë familjes.

Burim: Koha.net
— Redaksia ZHURMA