Të mbijetuarit e dhunës seksuale rrëfejnë përjetimet në Etno Fest
Në fshatin Kukaj, të mbijetuarit Ramadan Nishori dhe Shyhrete Tahiri rrëfyen përballjen me dhunën seksuale, ndërsa Teatri Bekim Fehmiu shfaqi dramën Pylli.
PRISHTINË — Ditën e katërt të edicionit të sivjetmë të festivalit tradicional Etno Fest organizatorët ia kanë kushtuar kujtesës së të mbijetuarve të dhunës seksuale gjatë luftës dhe rëndësisë së kujtesës kolektive. Ky aktivitet i veçantë ndërthuri debatin e rëndësishëm shoqëror me shfaqjet artistike, muzikore dhe teatrale në fshatin Kukaj.
Mbrëmja u hap me debatin e titulluar “Dëshmi, dinjitet dhe shpresë”, të organizuar nga Qendra Kosovare për Rehabilitimin e të Mbijetuarve të Torturës (KRCT). Në panel morën pjesë drejtoresha Feride Rushiti, si dhe Ramadan Nishori e Shyhrete Tahiri, të cilët ndanë rrëfimet e tyre mbi përballjen e vështirë me dhunën seksuale dhe procesin e shërimit.
Gjatë diskutimit panelistët theksuan rëndësinë e madhe të thyerjes së heshtjes dhe mbështetjes shoqërore, duke vënë në dukje se turpi u takon vetëm autorëve të krimeve. Programi artistik vijoi me interpretimin e sopranos Besarta Murtezani dhe Ansamblit “Dardanus” nga Tetova, të cilët sollën një ndërthurje të elegancës vokale dhe traditës muzikore.
Një nga momentet kulmore ishte shfaqja teatrore “Pylli” e Florian Zeller, e realizuar nga Teatri “Bekim Fehmiu” nën regjinë e Erson Zymberit, që trajtoi marrëdhëniet njerëzore. Mbrëmja u mbyll me atmosferën e Etno Nejës nën interpretimin e Naim Bunjakut – Xuxi, krahas falënderimeve për vullnetarët e festivalit.
Burim: KultPlus
— Redaksia ZHURMA
