Ervin Demo: Qytetarët kanë të drejtë të kërkojnë më shumë prej nesh

TIRANË — Gjatë Asamblesë Kombëtare të Partisë Socialiste, kryeministri Edi Rama ka propozuar Ervin Demon dhe Albana Koçiun për të drejtuar së bashku strukturat socialiste në Bashkinë e Tiranës. Pas këtij vendimi, Demo ka reaguar publikisht duke shprehur mirënjohjen për besimin e dhënë nga kryetari i PS-së dhe anëtarët e Asamblesë Kombëtare, teksa ka vlerësuar kontributin ndër vite të socialistëve.

Në mesazhin e tij, Demo ka theksuar se puna politike duhet të mbështetet te përgjegjësia individuale, puna në ekip dhe komunikimi i vazhdueshëm me qytetarët. «Qytetarët e Tiranës kanë të drejtë të kërkojnë më shumë prej nesh: shërbime publike më të mira, shkolla të sigurta për fëmijët, institucione që përgjigjen dhe zgjidhje për shqetësimet e përditshme», ka shkruar ai, duke shtuar se puna politike matet me afërsinë ndaj njerëzve dhe këmbënguljen për t'i zgjidhur problemet e tyre.

Sipas Demos, angazhimi do të shtrihet në çdo lagje, njësi administrative dhe fshat të kryeqytetit, ndërsa theksoi se përgjegjësia mbetet ndaj të gjithë banorëve pavarësisht bindjeve politike. Ai gjithashtu nënvizoi rëndësinë e dëgjimit të kritikave dhe përmirësimit të asaj që nuk funksionon.