Operacioni “Gjurmët”: Mbi 56 kg kanabis në Koman, katër në pranga
Policia e Shkodrës godet një veprimtari të prodhimit dhe shitjes së lëndëve narkotike, duke sekuestruar dhjetë thasë me kanabis.
Redaksia ZHURMA · · 1 min lexim
Katër persona janë arrestuar dhe një tjetër është proceduar penalisht në gjendje të lirë pas një operacioni të koduar “Gjurmët”, të zhvilluar nga Sektori për Hetimin e Narkotikëve në Drejtorinë Vendore të Policisë Shkodër. Gjatë hetimeve me metoda proaktive, autoritetet zbuluan se pesë shtetasit bashkëpunonin për të transportuar lëndën narkotike me automjete dhe varka drejt një zone të pyllëzuar në fshatin Koman.
Në këtë zonë, në një ambient të përshtatur për kamping dhe në automjetet e përdorura nga të dyshuarit, shërbimet e policisë gjetën dhe sekuestruan 10 thasë me mbi 56.7 kilogramë lëndë të dyshuar narkotike Cannabis Sativa. Në pranga përfunduan P. F., 45 vjeç, M. P., 39 vjeç, K. K., 33 vjeç, si dhe D. N., 67 vjeç, ndërsa në gjendje të lirë u procedua vëllai i 45-vjeçarit, A. F., 38 vjeç.
Materialet procedurale i janë referuar Prokurorisë për veprime të mëtejshme, ndërsa puna vijon për dokumentimin e plotë të veprimtarisë kriminale dhe identifikimin e personave të tjerë të përfshirë.
