Erjon Llapushi dënohet me 17 vite burg

Erjon Llapushi është dënuar me 17 vite burg nga Gjykata e Apelit për vrasje me dashje të kamarierit Gazment Kurmaku, ngjarje e ndodhur më 2 tetor 2021. Prokuroria e kishte cilësuar rastin si vrasje me dashje dhe kishte kërkuar një dënim maksimal prej 20 vitesh burgim.

Llapushi, i cili u shpall fajtor pasi goditi Kurmakun me grusht, reagoi përmes një deklarate ku kundërshton kualifikimin penal të ngjarjes. Ai këmbëngul se nuk ka pasur asnjëherë qëllim për të vrarë dhe pyet se si një goditje e vetme pa përdorimin e armëve apo planeve të mëparshme mund të konsiderohet vrasje me dashje.

Në deklaratën e tij, i dënuari thekson se nuk mohon tragjedinë apo dhimbjen e familjes së viktimës, por kërkon rivlerësimin e rastit mbi bazën e provave. Sipas Llapushit, nuk ka pasur asnjë konflikt të mëparshëm apo njohje të paraprake me të ndjerin që të justifikonte dashjen e vrasjes.

Një element që sipas tij nuk është vlerësuar mjaftueshëm gjatë procesit gjyqësor është një akt noterial i firmosur më 22 dhjetor 2021. Përmes këtij dokumenti, familja e viktimës kishte pranuar normalizimin e marrëdhënieve me familjen e Llapushit, pasi kjo e fundit kishte kërkuar ndjesë për ngjarjen.

Llapushi ngre një kritikë të ashpër mbi standardet e drejtësisë në Shqipëri, duke krahasuar rastin e tij me atë të Rei Matës. Ai pretendon se në raste me dinamika më të rënda dhe goditje të shumta është konstatuar mungesa e dashjes për vrasje, ndërsa në rastin e tij është zgjedhur kualifikimi më i rëndë.

I dënuari pretendon gjithashtu se është përndjekur prej vitesh dhe është ekspozuar padrejtësisht si një nga personat më të kërkuar në vend. Ai deklaron se do të kërkojë verifikim institucional për mënyrën se si janë trajtuar hetimet, procesi gjyqësor dhe vendimet e organeve ligjzbatuese.

Kjo çësje vë në dyshim konsistencën e kualifikimeve penale në rastet e dhunës që çojnë në vdekje, ku dallimi mes vrasjes me dashje dhe pakujdesit përcakton një diferencë drastike në vitet e burgimit.

Burim: Shekulli
— Redaksia ZHURMA