Erëra të forta shkaktojnë dëme materiale në Kosovë
Moti i keq ka sjellë dëme materiale dhe ndërhyrje të ekipeve emergjente në Prishtinë, ndërsa reshje shiu parashihen për orët e natës.
Redaksia ZHURMA · · 1 min lexim
PRISHTINË — Erërat e forta që kanë përfshirë Prishtinën dhe vendin kanë shkaktuar dëme materiale në disa komuna, ndërsa autoritetet u kanë bërë thirrje qytetarëve për kujdes të shtuar në hapësira të hapura. Sipas autoriteteve, deri më tani nuk ka pasur persona të lënduar nga moti i keq.
Lulzim Fushtica, drejtor i Drejtorisë për Siguri dhe Emergjenca në Kryeqytet, deklaroi se janë regjistruar pesë raste intervenimi kryesisht për dëmtime kulmesh dhe rrëzim drunjsh. Fushtica tha se ekipet kanë ndërhyrë te shkolla "Shkëndija" në Hajvali, te kopshti "Dielli" në Bregun e Diellit, në sheshin "Nëna Terezë" dhe në pjesë të tjera të qytetit. Nga ana tjetër, Besim Aliu nga Instituti Hidrometeorologjik i Kosovës njoftoi se erërat më të fuqishme janë regjistruar në Rrafshin e Dukagjinit, kryesisht në Prizren dhe Istog, ku shpejtësia ka arritur deri në 60 kilometra në orë.
Për orët e natës, parashihen reshje shiu me intensitet mesatar.
