Emërime diplomatike lidhen me zyrtarë e familjarë të pushtetit

Ministria e Punëve të Jashtme dhe Diasporës ka bërë disa emërime në misione diplomatike, ku janë përfshirë persona me lidhje familjare dhe afërsi me zyrtarë të lartë shtetërorë. Vendimet për këto pozita janë nënshkruar nga Glauk Konjufca, në cilësinë e Zëvendëskryeministrit të Parë dhe Ministrit në detyrë të Punëve të Jashtme dhe Diasporës. Ndër emrimet e fundit është ai i Vera Rexhepi Lecit, e cila është caktuar konsulle në Iowa për një mandat katërvjeçar, ndërsa ajo është bashkëshortja e Burim Lecit, i cili ka bashkëpunuar më parë me Luan Dalipin. Për këtë emërim dhe për dy të tjera të nënshkruara më parë, në vendime nuk figurojnë grada diplomatike të fituara më parë.

Në muajin maj të këtij viti, Konjufca kishte firmosur edhe emërimet e Kaltrina Dalipit në Berlin dhe Rina Dragidellës në Uashington. Kaltrina Dalipi, vajza e axhës së Luan Dalipit, u caktua Sekretare e Dytë në Ambasadën e Kosovës në Berlin pasi kishte udhëhequr Divizionin e Prokurimit Publik në këtë ministri, ndërkohë që në të njëjtin dikaster ka qenë e punësuar edhe motra e saj, Flaka Dalipi. Nga ana tjetër, Rina Dragidella, e cila është mbesa e ministrit të Punëve të Brendshme, Xhelal Sveçla, u emërua Sekretare e Dytë në Uashington megjithëse ishte punësuar në ministri në nëntor të vitit 2025, ndonëse rregullorja kërkon një vit shërbim paraprak për personat pa gradë. Këto zhvillime vijnë në kundërshtim me zotimin e dhënë nga kryeministri Albin Kurti gjatë fushatës së vitit 2021 se familjarët nuk do të kenë vend në institucione, ku ai pati deklaruar se «Fisi është për dasmë, për gazmend privat. S’ka dasma nëpër ministria».