Ekspozita me 30 fotografi të Nënë Terezës çelet në COD
Në kuadër të 70-vjetorit të marrëdhënieve diplomatike Shqipëri–Indi, u hap ekspozita me fotografi nga jeta e Nënë Terezës.
Një ekspozitë me 30 fotografi kushtuar Nënë Terezës u hap në Qendrën për Hapje dhe Dialog. Fotografitë dokumentojnë vizitat e saj në Shqipëri dhe ceremoninë e funeralit në Indi.
Në hapje morën pjesë ministri për Evropën dhe Punët e Jashtme, Ferit Hoxha, dhe ambasadori i Indisë në Shqipëri, Ravindra Prasad Jaiswal. Ministri Hoxha tha se Nënë Tereza nuk e dallonte njeriun nga pasaporta, kombësia apo feja, por nga nevojat dhe dinjiteti.
Ambasadori Jaiswal u shpreh se Nënë Tereza mishëron Shqipërinë dhe popullin e saj, dhe se kontributi i saj ka krijuar një lidhje të qëndrueshme mes dy vendeve.
Ekspozita vjen në kuadër të 70-vjetorit të marrëdhënieve diplomatike Shqipëri–Indi.
