Ekipi i Osmanit bën kallëzim penal për profilin e rremë 'Lule Gjeli'

PRISHTINË — Ekipi i ish-presidentes Vjosa Osmani ka bërë kallëzim penal në prokurori kundër administruesve të profilit të rremë "Lule Gjeli", i cili e ka akuzuar Osmanin publikisht për afera seksuale. Egnesa Vitia, këshilltare e ish-presidentes, e konfirmoi hapin ligjor për Periskopin, duke thënë se hetimi për identitetin e vërtetë të profilit është në vazhdim.

Sipas Vitisë, denoncimet e para në Polici për sulmet ndaj Osmanit kanë nisur që në muajin maj. Tani, përmes avokatëve, është dorëzuar edhe kallëzimi penal në Prokurori. Ajo tha se, sapo të konfirmohet identiteti i administruesve, do të ndiqen edhe padi civile për shpifje kundër personave përgjegjës.

Osmani vetë e ka lidhur më herët fushatën e sulmeve me Kryeministrin dhe kryetarin e Vetëvendosjes, Albin Kurti. "Urdhërdhënësi ka emër dhe mbiemër", deklaroi ajo në një emision televiziv, duke shtuar se asnjë prej linçimeve mes 6 marsit e sotmes nuk do të ndodhte pa dijeninë e Kurtit.

Prokuroria Speciale ka hapur hetim, ndërsa sipas raportimeve mediatike dyshohet se pas profilit "Lule Gjeli" qëndron Gent Prokshi, shqiptar nga Kosova që jeton në SHBA. Ish-zëvendëskryeministri Haki Abazi u ofrua të dëshmojë, duke thënë se e takoi Prokshin në Delaware më 2021. Abazi e cilësoi profilin si mjet të një "lufte hibride" në shërbim të Kurtit dhe Dejona Mihalit brenda Vetëvendosjes, që sipas tij sulmoi edhe zyrtarë amerikanë si Gabriel Escobar.

Zbulimi i identitetit të dyshuar shkaktoi reagime të reja: kryetari i Prishtinës, Përparim Rama, tha se edhe ai ishte sulmuar nga i njëjti profil.

Burim: Gazeta Metro
— Redaksia ZHURMA