Egnatia shet në Belgjikë mbrojtësin Numan Ajeti

Klubi i Egnatias ka finalizuar shitjen e mbrojtësit Numan Ajeti në Belgjikë, ndërsa zyrtarizimi i këtij transferimi do të kryhet gjatë merkatos së dimrit. Lëvizja e rëndësishme për “murin” e prapavijës u zbulua nga “Mega Sport”, duke konfirmuar se lojtari është shndërruar në një titullar të padiskutueshëm te kampionët e Superiores nën drejtimin e trajnerit Nevil Dede.

Vitet e fundit, 20-vjeçari ka regjistruar zhvillime të rëndësishme në karrierën e tij, përfshirë edhe debutimin me Kombëtaren U-21, pasi vendosi të largohej nga Maqedonia e Veriut. Te Egnatia ai mbërriti në merkaton e verës si lojtar i lirë pas përfundimit të bashkëpunimit me Shkëndijën e Tetovës, ku kërkonte më shumë hapësirë, ndërsa tashmë trajneri Dede ka ditur t'i nxjerrë në pah vlerat më të theksuara në fushë.