Edon Zhegrova drejt Turqisë: Pse mund të largohet nga Juventusi?
Anësori kosovar po kërkohet nga Trabzonspori i cili po përgatit një ofertë huazimi, pas minutave të kufizuara që pati te klubi italian gjatë sezonit të fundit.
TORINO — E ardhmja e anësorit të kombëtares së Kosovës, Edon Zhegrova, te Juventusi po bëhet e paqartë. Mediat italiane dhe turke raportojnë se Trabzonspori ka shprehur interesim të fortë për transferimin e tij gjatë afatit kalimtar të verës, duke e vendosur atë në listën e prioriteteve.
Zhegrova iu bashkua skuadrës bardhezi nga Lille në verën e vitit 2025, por nuk ka arritur të sigurojë një rol të rëndësishëm në Torino. Minutat e kufizuara në lojë dhe konkurrenca e madhe në repartin ofanziv kanë bërë që drejtuesit e klubit ta konsiderojnë largimin e tij.
Trabzonspori po punon për një marrëveshje huazimi me të drejtë ose detyrim blerjeje. Nga ana tjetër, drejtuesit e Juventusit nuk do ta kundërshtonin këtë lëvizje, pasi kjo do t'i lejonte futbollistit të luante më rregullisht sesa gjatë sezonit të kaluar në Itali.
Dëshira për të qenë protagonist dhe për të luajtur vazhdimisht është faktor kyç për Zhegrovën, veçanërisht në prag të sfidave të kombëtares së Kosovës. Futbollisti po i shqyrton me kujdes të gjitha opsionet përpara se të marrë vendimin e tij përfundimtar.
Negociatat aktualisht ndodhen në fazat e para dhe mbetet të shihet nëse ky interesim do të konkretizohet në ofertë zyrtare. Te Trabzonspori, Zhegrova do të mund të bëhej pjesë e një projekti ambicioz duke pasur një rol më të rëndësishëm.
Burim: Ekonomia Online
— Redaksia ZHURMA