Çfarë i tha Edi Rama gazetares së DW për privatizimin e hapësirave publike?

— Kryeministri Edi Rama u përplas me gazetaren e Deutsche Welle gjatë një interviste ku në qendër ishte vizioni i tij për transformimin e Shqipërisë dhe çmimi që vendi është i gatshëm të paguajë për këtë proces.

Kur u pyet nëse privatizimi i hapësirave publike është një çmim që qeveria është e gatshme ta paguajë, Rama e cilësoi pyetjen si një gënjeshtër të përsëritur intensivisht. Ai deklaroi se nuk ka privatizim të hapësirës publike dhe kërkoi nga gazetarja të sjellë prova konkrete për këtë akuzë.

Gazetarja e DW vuri në dukje se në vitin 2024 ligjet për mbrojtjen e mjedisit në Shqipëri u ndryshuan për t’u hapur rrugë turizmit me hotele luksoze. Sipas saj, kjo ka ngjallur shqetësim të madh në vend, veçanërisht për shkak të mungesës së konsultimit publik.

Rama pranoi se ka pasur ndryshime në ligj, por pohoi se thelbi i ligjit mbetet i njëjtë. Ai theksoi se këto ndryshime nuk bien ndesh me standardet evropiane, gjë që sipas tij do të verifikohet gjatë procesit të negociatave me Bashkimin Evropian.

Gjatë bisedës, kryeministri u referua edhe përdorimit të inteligjencës artificiale, duke përmendur prezantimin e një ministreje që sipas tij është një algoritëm. Ai paralajmëroi se algoritmet nuk i pëlqejnë të vërtetat e mërzitshme, por ushqejnë skandalin, zemërimin dhe frikën për të tërhequr natyrën njerëzore.

Rama bëri një dallim të prerë mes lirisë së shprehjes dhe asaj që quajti lirinë e arritjes (freedom of reach). Ai argumentoi se liria e arritjes është arma më e vdekjeprurëse e diktaturave, pasi u mundëson atyre të mbjellin të vërtetën e tyre duke mbytur zërat e tjerë pa pasur nevojë për polici sekrete.

Kryeministri përfundoi duke deklaruar se studimet tregojnë se rrjetet sociale shpërblejnë gënjeshtrat ndërsa e vërteta pranohet më pak. Ai vuri në dukje se algoritmi amplifikon gënjeshtrat dhe mbyt të vërtetën, duke krijuar një rrezik për shoqëritë demokratike.

Burim: Top Channel
— Redaksia ZHURMA