Dy shqiptare në garë për “Miss Belgium 2027”
Leona Krasniqi dhe Griselda Stragu synojnë të shkëlqejnë në një nga skenat më të rëndësishme të bukurisë në Evropë
BRUKSEL — Komuniteti shqiptar në Belgjikë do të ketë dy përfaqësuese në edicionin e ardhshëm të konkursit prestigjioz “Miss Belgium 2027”. Leona Krasniqi dhe Griselda Stragu, dy të reja me origjinë shqiptare, janë zyrtarisht pjesë e garës, duke synuar të shkëlqejnë në një nga skenat më të rëndësishme të bukurisë në Evropë.
Leona Krasniqi, e cila do të përfaqësojë qytetin e Antwerpenit me kodin MA29, vlerësohet për karakterin e saj, përkushtimin dhe ambicien. Ajo e konsideron pjesëmarrjen në “Miss Belgium” si më shumë sesa një konkurs bukurie, duke e parë atë si një mundësi për të promovuar vlerat, kulturën dhe identitetin shqiptar.
Edhe Griselda Stragu, me origjinë nga Shkodra dhe me banim në Belgjikë, është konfirmuar si kandidate në ‘Miss Belgium 2027’. Ajo synon të përfaqësojë me dinjitet rrënjët e saj shqiptare, duke dëshmuar se bukuria shkon përtej pamjes së jashtme dhe se puna, përkushtimi dhe vetëbesimi janë çelësi i suksesit. Pjesëmarrja e dy shqiptareve në “Miss Belgium 2027” vjen në një kohë kur të rinjtë shqiptarë po shënojnë suksese të rëndësishme në fusha të ndryshme të jetës publike, profesionale dhe kulturore, duke dëshmuar integrim të suksesshëm dhe potencial të lartë.
Burim: Zëri, http://www.zeri.info/showbiz/631547/dy-shqiptare-ne-gare-per-miss-belgium-2027/
— Redaksia ZHURMA