Duffy: SHBA ka rihapur hapësirën ajrore por normalizimi kërkon kohë

Administrata Federale e Aviacionit (FAA) ka rihapur hapësirën ajrore të Shteteve të Bashkuara pas heqjes së urdhrit kombëtar për ndalimin e ngritjes së avionëve, por Sekretari i Transportit Sean Duffy deklaroi se normalizimi i fluturimeve do të bëhet gradualisht me kohë pas kaosit të shkaktuar nga anulimi i mbi 4,700 fluturimeve dhe vonesa e të paktën 10,000 të tjerave.

Ndalimi i fluturimeve u vendos të premten, më 13 nëntor, për shkak të një defekti serioz që preku sistemet e komunikimit dhe të kontrollit të trafikut ajror. Autoritete amerikane bënë të ditur se dyshimet e para lidhen me mbingarkesën e pajisjeve të vjetruara teknologjike. Problemi nisi të premten në orën 15:36 sipas kohës së Bregut Lindor, kur u vërejt paqëndrueshmëri në transmetimin e të dhënave, komunikimin e kontrollorëve dhe sistemet e radarëve. Kjo ndërprerje preku rrjetin e 22 qendrave rajonale të kontrollit që menaxhojnë lëvizjen e avionëve midis rajoneve. Për shkak të rrethanave të jashtëzakonshme dhe arsyeve të sigurisë, FAA lëshoi një urdhër për ndalimin e të gjitha ngritjeve nga pista në nivel kombëtar, ndërsa FAA njoftoi se masa u hoq të premten në mbrëmje në orën 20:15 sipas kohës lokale.

Gjatë kohës kur hyri në fuqi urdhri i ndalimit, në hapësirën ajrore amerikane ndodheshin rreth 3,500 avionë sipas të dhënave të monitorimit të trafikut ajror. Kontrollorët vazhduan udhëzimin e tyre drejt uljeve të sigurta, ndërsa fluturimet emergjente dhe ato ndërkombëtare morën trajtim të veçantë. Nga ky numër total, sipas të dhënave të komunikimit, 670 avionë u kthyen mbrapsht në pikat nga ku ishin nisur, kurse 157 të tjerë u ulen në aeroporte alternative. Pasojat e këtij pezullimi vazhduan edhe të shtunën me qindra anulime të tjera, ndërsa mijëra pasagjerë mbetën të bllokuar nëpër aeroporte. Kompanitë ajrore njoftuan se po përpiqen të riorganizojnë avionët dhe ekuipazhet që mbetën jashtë vendeve të tyre të planifikuara. Autoritetet konfirmuan se të gjithë avionët në ajër u monitoruan plotësisht dhe se nuk u raportua asnjë aksident apo incident ajror gjatë gjithë krizës.

Pasojat e ndërprerjes dhe efektit zinxhir në oraret e fluturimeve pritet të vazhdojnë edhe në ditët në vijim, ndërsa linjat ajrore punojnë për kthimin e mjeteve fluturuese dhe ekuipazheve në aeroportet nga ku ishte parashikuar nisja e tyre. Udhëtarët në aeroportet amerikane pritet të përballen me vonesa të mëtejshme dhe ndryshime të orareve gjatë procesit të rikthimit gradual të operacioneve ajrore në normalitet.

Sekretari amerikan i Transportit, Sean Duffy, deklaroi se hapësira ajrore është rihapur, por paralajmëroi se do të duhet kohë për të përballuar pasojat e asaj që ndodhi. Ai konfirmoi se normalizimi i trafikut ajror do të bëhet në mënyrë graduale. Ndërkohë, një shënim i marrë nga ABC News udhëzoi pilotët që të ktheheshin menjëherë në portat e aeroportit për shkak të urdhrit të lëshuar nga FAA për ndalimin e ngritjes së avionëve në shkallë kombëtare.