DPHM: sot shi i rrëmbyeshëm, bubullima e breshër në Shkup
Deri të premten priten reshje edhe më të dendura dhe rënie e ndjeshme e temperaturave, njofton DPHM.
SHKUP — Drejtoria për Punë Hidrometeorologjike (DPHM) njoftoi se sot pritet paqëndrueshmëri lokale me reshje të rrëmbyeshme shiu, bubullima, erë të përforcuar dhe kushte për mot të ligë të izoluar me paraqitje të breshrit. Erë e dobët deri mesatare do të fryjë nga veriu, me përforcime përgjatë luginës së Vardarit, ndërsa në pjesët perëndimore era do të vijë nga perëndimi.
Temperatura minimale pritet të lëvizë nga 12 deri në 21 gradë, ndërsa ajo maksimale nga 27 deri në 33 gradë Celsius. Në Shkup, DPHM parashikon 17 gradë minimale dhe 30 gradë maksimale, me vranësira të ndryshueshme e periudha me diell, por edhe reshje të rrëmbyeshme shiu e bubullima në disa pjesë të luginës.
Sipas DPHM-së, deri të premten moti do të mbetet me vranësira të ndryshueshme dhe vende-vende i paqëndrueshëm, me reshje shiu e bubullima dhe procese të izoluara të motit të ligë të shoqëruara nga erë e fortë e breshër. Të premten priten reshje më të dendura, ndërsa depërtimi i një mase ajrore më të ftohtë nga veriu do të sjellë rënie të ndjeshme të temperaturave.
Burim: Gazeta Express
— Redaksia ZHURMA