Dogana kap 504 copë Barium Sulfate kontrabandë në Qafë Prush
Substanca kimike Barium Sulfate u zbulua e fshehur në bagazhin e një veture, ndaj drejtuesit të së cilës ka nisur procedura administrative.
GJAKOVË — Dogana e Kosovës, në bashkëpunim me Policinë, ka parandaluar kontrabandimin e 504 produkteve të padeklaruara në pikën e kalimit kufitar në Qafë Prush. Gjatë një kontrolli rutinë të automjeteve në hyrje të vendit, zyrtarët përzgjodhën një veturë për verifikim më të detajuar, duke zbuluar mallrat e fshehura në bagazh.
Para kontrollit, drejtuesi i automjetit kishte deklaruar se nuk posedonte asgjë për të paraqitur para autoriteteve doganore. Megjithatë, kontrolli zbuloi sasinë prej 504 copë Barium Sulfate të fshehura në bagazh, duke shkelur Kodin Doganor dhe të Akcizave Nr. 08/L-247, që obligon deklarimin e plotë të mallrave.
Autoritetet konstatuan se drejtuesi tentoi të fusë mallra në territorin e Kosovës pa i paraqitur për kontroll dhe pa përmbushur detyrimet ligjore. Ndërkohë, mallrat janë sekuestruar dhe ndaj rastit do të zhvillohen procedurat e mëtejshme administrative dhe kundërvajtëse në përputhje me legjislacionin doganor në fuqi.
Burim: Telegrafi
— Redaksia ZHURMA