Dogana e Kosovës ndërmerr aksion në dy barnatore në Prizren

PRIZREN — Dogana e Kosovës ka ndërmarrë veprime në dy barnatore në Prizren, «Menta» dhe «Menta Plus», në kuadër të rastit që lidhet me dyshimet për tregtimin e produkteve farmaceutike të kontrabanduara dhe të futura në treg në mënyrë të kundërligjshme. Kontrollet e mëhershme të realizuara me urdhër të Gjykatës Themelore në Prizren, në bashkëpunim me Inspektoratin Shëndetësor dhe Farmaceutik të Ministrisë së Shëndetësisë, kishin zbuluar depo të fshehta ku mbaheshin barna pa banderola në hapësira që nuk i plotësonin kushtet e nevojshme për ruajtjen e produkteve.

Gjatë aksionit të zhvilluar më 5 nëntor në dy lokacione në Prizren, në njërën barnatore dhe depon përkatëse ishin gjetur produkte medicinale pa banderola në vlerë të përafërt prej 8 mijë eurosh, kurse në barnatoren tjetër ishin gjetur produkte të ngjashme në vlerë rreth 2 mijë euro, duke çuar vlerën e përgjithshme të konfiskuar nga Dogana e Kosovës në rreth 10 mijë euro. Përveç konfiskimit të mallit, dy persona të dyshuar ishin ndaluar për 48 orë, ndërsa hetimet vijojnë për veprën penale të prodhimit dhe shpërndarjes së produkteve të dëmshme mjekësore.