Dizdari boton libër mbi pullat postare të Kosovës — 15 emisione në 25 vjet

PRISHTINË — Studiuesi i filatelisë Hysen S. Dizdari boton librin e tij të ri "Arkeologjia në pullat postare të Kosovës (2000–2025)", libri i gjashtë i autorit dhe vazhdim i veprës "Arkeologjia në pullat postare shqiptare (1913–2018)". Botimi përmban 15 emisione pullash postare kushtuar monumenteve arkeologjike të zbuluara në Kosovë, të emetuara nga Posta e Kosovës gjatë 25 viteve, nga 2000 deri në 2025.

Libri nis me emisionin kushtuar Mozaikut të Orfeut dhe Hyjneshës Dardane, ndërsa emisioni i dytë paraqet artefakte të zbuluara në territorin e Dardanisë. Emisioni i katërt i kushtohet zbulimeve arkeologjike në qytetin antik të Ulpianës, i teti Kalasë së Prizrenit, ndërsa i pesëmbëdhjeti mozaikut të bazilikës episkopale të Justinianit II në Ulpianë, që daton rreth viteve 535–545.

Parathënien e ka shkruar akademiku dhe arkeologu Prof. Dr. Neritan Ceka, i cili në faqet e para shtron pyetjen: "A mund të përcillet historia e një vendi përmes pullave postare?" Sipas librit, përgjigjja është po — pulla postare, kur analizohet në kontekst historik e kulturor, shndërrohet në një dokument të vogël me fuqi të madhe dëshmuese.

Redaktimi gjuhësor është kryer nga Prof. Dr. Anton Nikë Berisha, ndërsa përkthimin në gjermanisht e ka bërë Albert Gjoka dhe në frëngjisht Fatos Morina. Frida Vukopola Gjoka ka kontribuar në përgatitjen e materialeve dhe koordinimin e botimit, ndërsa realizimin grafik e ka bërë Ilir Drizari. Libri botohet nga shtëpia botuese "Emal".

Vepra mund të konsiderohet botimi i parë monografik i këtij lloji në filatelinë e Kosovës. Deri më sot, referencat kryesore kanë qenë katalogët ndërkombëtarë Michel, Scott, Yvert & Tellier dhe Stanley Gibbons, të cilët identifikojnë emisionet postare, por nuk trajtojnë dimensionin historik e kulturor të tyre — boshllëk që synon ta mbushë ky libër.

Botimi përfshin edhe rubrika ndihmëse: listë shkurtimesh filatelike, fjalor të shkurtër filatelik, këshilla për filatelistët e rinj, pasthënie vlerësuese dhe bibliografi të ndarë në literaturë arkeologjike-historike e filatelike. Libri botohet në tri gjuhë — shqip, gjermanisht dhe frëngjisht — çka e bën të aksesueshëm edhe për komunitetin evropian të filatelistëve e studiuesve.

Burim: Fjala
— Redaksia ZHURMA