Disha-Haxhosaj: Mbrojtja e viktimave të dhunës në familje kërkon veprime konkrete

Ushtruesja e detyrës së kryeprokurores në Prokurorinë Themelore në Pejë, Valbona Disha-Haxhosaj, ka drejtuar një takim ndërinstitucional me fokus parandalimin dhe trajtimin e rasteve të dhunës në familje, si dhe avancimin e mbrojtjes për viktimat. Në këtë ngjarje morën pjesë prokurorë shtetërorë, përfshirë koordinatorin e ri për dhunë në familje, Ermal Demhasaj, prokurorë për të mitur, mbrojtës të viktimave, si dhe delegatë nga Policia e Kosovës, Qendrat për Punë Sociale dhe Qendra e Shëndetit Mendor në Pejë.

Gjatë takimit u theksua nevoja për identifikim të hershëm të rrezikut, shkëmbim të shpejtë informacioni dhe përgatitje raportesh për sfidat, sidomos në rastet me viktima të mitura apo persona me probleme të shëndetit mendor. Disha-Haxhosaj kërkoi llogaridhënie dhe veprim të menjëhershëm nga institucionet. «Nuk duhet të kemi frikë të flasim për atë që nuk funksionon. Duhet të kemi përgjegjësi që ta ndryshojmë atë që nuk funksionon. Viktimat nuk kanë nevojë për premtime. Kanë nevojë për mbrojtje. Nuk kanë nevojë për arsyetime. Kanë nevojë për veprime. Dhe nuk kanë nevojë që institucionet të reagojnë vetëm pasi të ndodhë tragjedia. Kanë nevojë që ne të veprojmë para se të jetë tepër vonë. Ky është standardi që kërkoj nga vetja, nga Prokuroria që udhëheq dhe nga secili prej jush», u shpreh ajo.

Pjesëmarrësit diskutuan gjithashtu caktimin e personave kontaktues për koordinim të drejtpërdrejtë dhe monitorim të zbatimit të rekomandimeve. Prokuroria theksoi përkushtimin për trajtimin me prioritet të këtyre rasteve për të parandaluar përshkallëzimin e dhunës.