Detaje nga takimi i LPK-së me Ibrahim Rugovën në fillim të viteve ’90
Veprimtari Ramadan Avdiu ka rrëfyer detaje nga takimet e hershme mes përfaqësuesve të Lëvizjes Popullore të Kosovës dhe presidentit Ibrahim Rugova.
Redaksia ZHURMA · · 2 min lexim
Takimet mes përfaqësuesve të Lëvizjes Popullore të Kosovës dhe presidentit Ibrahim Rugova në fillim të viteve ’90 janë trajtuar në ciklin “Dosjet”. Veprimtari Ramadan Avdiu ka treguar hollësi për bisedimet mes Lëvizjes ilegale dhe Lidhjes Demokratike të Kosovës.
Sipas Avdiut, në atë takim ishin të pranishëm Ramadan Avdiu, Xhavit Haziri dhe Azem Syla. Ai ka treguar se biseda përfshiu çështjen e stigmatizimit dhe diskualifikimit, ndërsa një nga temat e para të ngritura nga Rugova kishte të bënte me furnizimin me armë. Fjalët e tij të para, sipas Avdiut, ishin: “a keni hekra hiç?”, ku me termin “hekra” Rugova nënkuptonte armët.
Gjatë të njëjtit takim, Azem Syla kishte vlerësuar se shpërbërja e Jugosllavisë ishte e pashmangshme dhe se ajo nuk do të ndodhte pa luftë. Për komunikimet me Rugovën ka folur edhe Ali Ahmeti, i cili ka treguar se Rugova theksoi se ishte i përcaktuar për mënyrën e tij të bërjes së politikës dhe se për më tutje kërkoi që të takoheshin me Fehmi Aganin.
Përfaqësuesit e LPK-së kishin pasur kontakte edhe me Bujar Bukoshin, ndërsa në një fazë kishin shprehur gatishmërinë për t’u përfshirë në strukturat qeverisëse, duke kërkuar përgjegjësi ekskluzivisht në Ministrinë e Mbrojtjes.
