Policia italiane zbulon plantacionin me 1.206 bimë kanabisi dhe arreston një shqiptar

Karabinierët italianë kanë arrestuar një shtetas shqiptar në Coassolo Torinese pas zbulimit të një plantacioni të brendshëm me 1.206 bimë kanabisi, me vlerë mbi një milion euro në tregun e paligjshëm. Personi i prandaluar kujdesej për kultivimin, ndërsa pesë shqiptarë të tjerë janë vendosur nën hetim nga autoritetet gjyqësore.

Hetimet e këtij rasti kanë nisur në janar të vitit 2026 nga Njësia Hetimore e Komandës Provinciale të Karabinierëve të Astit, nën drejtimin e Prokurorisë së Republikës së Astit. Veprimet hetimore u përqendruan te një grup personash me origjinë shqiptare, të cilët dyshoheshin për trafik droge dhe mbajtje të paligjshme armësh. Sipas hetuesve, aktiviteti i paligjshëm i këtij grupi mund të kishte lidhje direkte edhe me funksionimin e një lokali nate në qytetin e Astit. Më 20 prill 2026, autoritetet arrestuan një 47-vjeçar shqiptar, banues në Asti, pasi gjatë kontrolleve në dy prona në dispozicion të tij u sekuestruan rreth 22 kilogramë kokainë, pesë pistoleta, një silenciator artizanal dhe më shumë se 200 fishekë, përfshirë municione luftarake. Sasia e kokainës përfaqësonte dhjetëra mijëra doza me vlerë disa milionë euro. Hetimet e mëtejshme çuan në identifikimin e pesë personave të tjerë me origjinë shqiptare më 21 korrik 2026, të cilët u referuan për procedim penal.

Sipas autoriteteve italiane, struktura e posaçme për kultivimin e marijuanës ishte ngritur brenda një magazinë të izoluar dhe të rrethuar nga pyjet. Mjedisi ishte pajisur tërësisht me sisteme ndriçimi, ventilimi dhe ngrohjeje për të garantuar rritjen e bimëve. Shqiptari i arrestuar, me banim në Asti, është dërguar në burgun e Ivreas, ndërsa magazina bashkë me pajisjet u sekuestruan. Më 20 tetor, organet gjyqësore autorizuan 13 kontrolle në Asti, në disa komuna të provincës dhe në territorin e Coassolo Torinese. Gjatë këtyre kontrolleve në banesat e të hetuarve u gjet një sasi e vogël lënde narkotike te njëri prej tyre dhe 100 fishekë armësh zjarri te një tjetër. Hetuesit njoftuan se vëmendjen e tyre e kishte tërhequr konsumi i lartë i energjisë elektrike në magazinë. Sipas vlerësimeve të personelit të rrjetit elektrik, impianti i lidhur në mënyrë të paligjshme konsumonte nga 80 deri në 100 kilovat-orë në ditë për ndriçimin, ventilimin dhe ngrohjen.

Autoritetet gjyqësore dhe policore në Asti po vazhdojnë procedimin penal ndaj pesë personave të tjerë me origjinë shqiptare që janë nën hetim për përfshirje të mundshme në rrjetin e dyshuar të trafikut të drogës dhe armëve.