Pse arrestohet Daniel Gjura?

— Daniel Gjura, zëvendësdrejtori i Kadastrës Dibër, që më herët ka mbajtur edhe postin e drejtorit, si dhe kandidoi për deputet nën siglën e PS në zgjedhjet e 2025, është arrestuar mbrëmjen e sotme nga policia.

Pasi që policia e Dibrës goditi një skemë të dyshuar kriminale për tjetërsimin e paligjshëm të pronave në Dibër, arrestimi i tij vjen pak ditë më pas. Gjura ishte shpallur në kërkim nga policia pasi ndaj tij është caktuar masa e sigurisë “Arrest në burg” për veprat penale “Mashtrimi” dhe “Falsifikimi i dokumenteve”, kryer në bashkëpunim.

Burimet bëjnë të ditur se momentalisht Daniel Gjura po merret në pyetje nga policia.

Arrestimi i tij lidhet me akuzat për falsifikim dokumentesh dhe tjetërsim pronash. Kujtojmë se më 17 qershor, pas një hetimi 7-mujor, Policia ka ekzekutuar 14 masa sigurie ndaj punonjësve dhe ish-punonjësve të Agjencisë Shtetërore të Kadastrës, si dhe ndaj disa personave të dyshuar se kanë përfituar nga falsifikimi i dokumenteve.

Nga hetimet dyshohet se shtetasit me detyra aktuale dhe të mëparshme në Agjencinë Shtetërore të Kadastrës, Dibër, dhe noterja, në bashkëpunim me njëri-tjetrin, kanë falsifikuar dokumente dhe kanë kryer veprime të tjera administrative të kundërligjshme, me qëllim tjetërsimin e pronave të paluajtshme, në favor të shtetasit T. D. dhe familjarëve të tij.

Polica thotë se këto ngjarje është pjesë e një hetimi të gjerë mbi falsifikimin e dokumenteve dhe tjetërsimin e pronave në Dibër.

Burim: Ora News, https://www.oranews.tv/vendi/falsifikimi-i-dokumenteve-ne-kadastren-e-dibres-arrestohet-ish-kandidati-i-i1334874

— Redaksia ZHURMA