Ronaldo mbyll karrierën me Portugalinë më 24 shtator — 233 ndeshje, 146 gola

— Cristiano Ronaldo raportohet se është gati të njoftojë pensionimin nga futbolli ndërkombëtar, pasi të zhvillojë edhe një ndeshje të fundit me Kombëtaren e Portugalisë. Sipas raportimeve, sfida e fundit e tij me fanellën e Portugalisë pritet të jetë ajo ndaj Uellsit më 24 shtator, në kuadër të Ligës së Kombeve, në stadiumin “José Alvalade”.

Siç raporton “Goal”, çështja e së ardhmes së Ronaldos me Portugalinë tashmë duket se ka marrë një datë konkrete, pasi ai planifikon të tërhiqet nga kombëtarja pas kësaj përballjeje në Lisbonë. Ky zhvillim përkon edhe me ardhjen e trajnerit të ri të Portugalisë, Jorge Jesus, i cili është emëruar me një kontratë katërvjeçare.

Jesus ka bërë të ditur se nuk planifikon ndryshime të mëdha në skuadër. “Njerëzit mund të mendojnë se trajneri i ri do të vijë dhe do të ndryshojë shumë lojtarë. Kjo nuk do të ndodhë. Nuk jam budalla. Për më tepër, nuk kam kohë të mjaftueshme për të afruar disa lojtarë që nuk janë ftuar këtë herë”, ka deklaruar ai për “Canal 11”.

Nëse largohet pas ndeshjes ndaj Uellsit, Ronaldo do ta mbyllë karrierën me Kombëtaren e Portugalisë me statistika mbresëlënëse: 233 paraqitje dhe 146 gola, duke qenë futbollisti me më së shumti ndeshje dhe golashënuesi më i mirë në historinë e futbollit ndërkombëtar. Me Portugalinë, ai ka fituar Kampionatin Evropian në vitin 2016, si dhe dy trofe të Ligës së Kombeve të UEFA-s, në vitet 2019 dhe 2025.

41-vjeçari mbetet nën kontratë me Al Nassr deri në verën e vitit 2027. Ai ka realizuar 976 gola gjatë karrierës së tij dhe synon të arrijë shifrën prej 1000 golash përpara se t’i japë fund përfundimisht futbollit, ndërsa pas largimit nga kombëtarja fokusi i tij pritet të jetë i përqendruar vetëm te futbolli me klub.

Burim: Insajderi

— Redaksia ZHURMA