Çfarë po ndodh me çmimet e banesave në Shqipëri?

TIRANË — Çmimet e banesave në Shqipëri kanë vijuar të rriten gjatë vitit 2025, por numri i transaksioneve ka shënuar rënie në gjysmën e dytë të vitit. Banka e Shqipërisë thotë se kërkon më shumë kohë dhe të dhëna për të kuptuar nëse bëhet fjalë për ngadalësim të tregut apo për korrigjim pas ritmeve të larta të shitjeve në fillim të vitit.

Klodion Shehu, drejtor i Departamentit të Stabilitetit Financiar në Bankën e Shqipërisë, theksoi se institucioni monitoron vazhdimisht zhvillimet në tregun e pasurive të paluajtshme. Sipas tij, sektori bankar shqiptar paraqitet i qëndrueshëm, me tregues të mirë financiarë dhe cilësi të kënaqshme të portofolit të kredisë.

Shehu nënvizoi se interesi për blerjen e pronave, veçanërisht në zonat bregdetare, mbetet i lartë. Kjo kërkesë mbështetet nga blerësit vendas, shtetasit jorezidentë, dhe nga zhvillimi i vazhdueshëm i sektorit të turizmit, i cili po nxit investimet në pasuri të paluajtshme.

Duke folur për kreditimin e banesave, ai u bëri thirrje qytetarëve të tregohen të kujdesshëm përpara marrjes së një kredie, duke analizuar të ardhurat aktuale dhe perspektivën financiare. Banka e Shqipërisë ka ndërmarrë masa makroprudenciale për kreditë e reja për pasuri të paluajtshme, me synim forcimin e stabilitetit financiar dhe mbrojtjen e konsumatorëve nga mbingarkesa me borxhe.

Burim: ATSH, https://ata.gov.al/2026/06/16/shehu-cmimet-e-banesave-vijojne-rritjen-tregu-mbeshtetet-nga-zhvillimi-i-vazhdueshem-i-sektorit-te-turizmit/
— Redaksia ZHURMA