Çitaku paralajmëron vizita në BE dhe SHBA për procesin e UÇK-së në Hagë

Ushtruesja e detyrës së kryetares së Partisë Demokratike të Kosovës, Vlora Çitaku, ka paralajmëruar se do të ndërmerren iniciativa të reja politike dhe diplomatike lidhur me procesin gjyqësor ndaj ish-krerëve të Ushtrisë Çlirimtare të Kosovës që po zhvillohet në Hagë. Gjatë një paraqitjeje në emisionin «Rubikon», ajo bëri të ditur se bashkë me kolegët e saj kanë zhvilluar takime të shumta me diplomatë dhe ambasadorë, ndërsa paralajmëroi vizita në qendrat vendimmarrëse të Bashkimit Evropian dhe Shteteve të Bashkuara të Amerikës për ta ngritur alarmin rreth kësaj çështjeje.

Çitaku theksoi se nismat dhe kërkesat e grupit strategjik, përfshirë ato në Kuvendin e Kosovës, nuk duhet të shihen si ndërhyrje në drejtësi apo si përpjekje për t'i shmangur përgjegjësitë ligjore. Sipas saj, nisma ligjore është vetëm e para dhe pas saj do të pasojnë hapa të tjerë, me qëllim që procesi të rikthehet në binarët e drejtësisë. Ajo u shpreh se lufta çlirimtare është kriminalizuar përmes kualifikimit të UÇK-së si ndërmarrje e përbashkët kriminale, duke shtuar se askush nuk e mohon ekzistencën e viktimave, por për to nuk është dhënë drejtësi.