Cilët ish-futbollistë të Kombëtares morën licencën UEFA A?
Federata e Futbollit mbylli edicionin e 23-të të kursit për licencën e trajnerit, ku u kualifikuan 25 persona, përfshirë Xhakën dhe dy Gjasulat.
TIRANË — Edicioni i 23-të i kursit për licencën e trajnerit UEFA A ka përfunduar me sukses pas gjashtë muajve trajnime intensive. Programi i formimit të trajnerëve, i cili nisi në muajin janar, u organizua nga Federata e Futbollit në bashkëpunim të ngushtë me UEFA-n.
Në ceremoninë përmbyllëse të këtij programi u ndanë licencat për 25 trajnerë të rinj të kualifikuar. Ndër ta spikasin ish-futbollistët e njohur të Kombëtares shqiptare, Taulant Xhaka, Klaus Gjasula dhe Jurgen Gjasula, të cilët tashmë mund të ushtrojnë këtë profesion në nivele profesionale.
Përveç emrave të njohur të Kombëtares, në këtë grup të licencuarish morën pjesë edhe ish-lojtarë të njohur të kampionatit shqiptar si Olsi Teqja, Oerd Kotja, Rejnaldo Troplini dhe Rigers Dushku. Në këtë ceremoni morën pjesë Drejtori Teknik Abdyl Kuriu, Afrim Tola dhe Ardi Behari.
Kjo licencë përfaqëson një nga nivelet më të rëndësishme në sistemin e edukimit të UEFA-s, duke qenë e detyrueshme për drejtimin e skuadrave të para dhe moshave U-21 e U-19. Ky hap shënon një fillim të ri për ish-lojtarët që synojnë të marrin drejtimin e pankinave.
Burim: ATSH
— Redaksia ZHURMA