Çarshia e Vjetër e Shkupit bojkoton "Kryeqytetin Evropian të Kulturës 2028"

SHKUP — Esnafi i Çarshisë së Shkupit ka reaguar ashpër pas formimit të Fondacionit "Shkupi – Kryeqyteti Evropian i Kulturës 2028", duke e quajtur "të pakuptimtë dhe të papranueshme" përjashtimin e Çarshisë së Vjetër nga një projekt që pretendon të përfaqësojë kulturën e qytetit.

Në një deklaratë publike, organizata që përfaqëson mbi 400 anëtarë aktivë dhe mbi 1000 biznese në zemrën historike të Shkupit, tha se fondacioni synon të promovojë diversitetin dhe bashkëpunimin kulturor, por "në realitet nuk përfaqëson diçka të tillë".

Esnafi i Çarshisë e cilësoi përjashtimin e tij nga çdo proces konsultativ dhe vendimmarrës si "neglizhencë serioze ndaj trashëgimisë kulturore që përfaqësojmë", jo si rastësi. Organizata paralajmëroi se do t'i injorojë dhe bojkotojë plotësisht aktivitetet e fondacionit.

Reagimi u përshkallëzua edhe më tej me kritikë ndaj personazhit publik të emëruar në krye të Fondacionit, duke thënë se "veprimtaria e të cilit ka qenë vazhdimisht objekt kritikash" për qasjen ndaj diversitetit kulturor dhe gjuhësor në institucionet që ka drejtuar.

"Një projekt që mban vulën e Bashkimit Evropian duhet të udhëhiqet nga figura që gëzojnë besim të gjerë shoqëror dhe që mishërojnë vlerat e përfshirjes, barazisë dhe respektit të ndërsjellë", thuhet në deklaratë.

Esnafi theksoi se nuk kërkon privilegje, por "përfaqësim të denjë të të gjithë faktorëve që kanë kontribuar dhe vazhdojnë të kontribuojnë në identitetin kulturor të Shkupit". U bëri thirrje Qytetit të Shkupit dhe Fondacionit të rishikojnë përbërjen dhe qasjen e tyre.

"Çarshia e Shkupit ka qenë dhe do të mbetë evropiane me ose pa fondacionet e politizuara e përjashtuese të Qytetit të Shkupit. Ne nuk do të lejojmë që tradita dhe mikpritja jonë të përdoren si dekor i thjeshtë për projekte, nga të cilat përjashtohet vetë shpirti dhe identiteti i vërtetë i Shkupit shumetnik", përfundon reagimi.

Burim: TV21
— Redaksia ZHURMA