Çfarë planifikon Çairi për bibliotekën në Çarshinë e vjetër të Shkupit?
Kryetari Izet Mexhiti njoftoi procedurat për një leximore-bibliotekë me libra në gjuhën shqipe në hapësirën mbi sheshin Skënderbe.
SHKUP — Pas Panairit të parë shqiptar të librit, Komuna e Çairit do të nisë procedurën për hapjen e një biblioteke moderne në Çarshinë e vjetër të Shkupit. Kryetari Izet Mexhiti tha se investimet në kulturën shqiptare, arsimin, botimet dhe artin do të vazhdojnë me një "leximore-bibliotekë me libra në gjuhën shqipe".
Hapësira e synuar është një konstruksion ekzistues mbi sheshin Skënderbe, të cilin Mexhiti e përshkroi si me "potencial transformimi". Ai theksoi se biblioteka do t'u shërbejë të rinjve për të lexuar, studiuar, hulumtuar dhe takuar autorë.
Në panair mori pjesë edhe botuesja Irena Toçi, e cila vlerësoi Shkupin si "një nga tre qendrat më të mëdha të shqiptarëve në rajon". Akademiku Ali Aliu i urroi manifestimit jetëgjatësi. Mexhiti njoftoi se aktivitetet kulturore dhe sportive do të vazhdojnë në kuadër të programit veror të Çairit.
Burim: Telegrafi
— Redaksia ZHURMA
