Bulevardi “Epidamn” i Durrësit i dedikuar vetëm për këmbësorët në verë

TIRANË — Bulevardi “Epidamn” në qytetin e Durrësit do të shndërrohet në një zonë të dedikuar vetëm për këmbësorët gjatë mbrëmjeve të sezonit veror, në kuadër të masave për rritjen e sigurisë dhe përmirësimin e përvojës së qytetarëve dhe turistëve. Masat do të hyjnë në fuqi nga 1 korriku deri më 31 gusht 2026, çdo mbrëmje në intervalin 19:00–23:00.

Për të garantuar rrjedhën e qarkullimit, do të zbatohen ndryshime të përkohshme në lëvizjen e mjeteve. Rrugët “Karl Topia” dhe “Gjergji Komnino” do funksionojnë me një sens lëvizjeje drejt Vilës së Zogut, ndërsa rrugët “Telha Çela” dhe “11 Dëshmorët e Stanit” do kenë një sens lëvizjeje zbritës drejt Mausoleut të Dëshmorëve.

Gjatë orarit 19:00–23:00, ndalohet parkimi i automjeteve në rrugën “Anastas Durrsaku” në segmentin nga Kisha Ortodokse deri te Shkolla “Gjergj Kastrioti”, si dhe në rrugët “Karl Topia”, “Gjergji Komnino” dhe “Hysen Matlija”. Këto masë synojnë të reduktojnë trafikun dhe të rrisin hapësirën për ecjen në qendër.

Bashkia Durrës i bën thirrje drejtuesve të automjeteve dhe qytetarëve që të respektojnë sinjalistikën e përkohshme dhe ndryshimet në qarkullim, duke ndihmuar në krijimin e një ambienti më të sigurt dhe më të këndshëm për shëtitje dhe aktivitete turistike në qendër gjatë verës.

*Burim: ATSH, https://ata.gov.al/2026/06/29/nga-1-korriku-bulevardi-epidamn-ne-durres-vetem-per-kembesoret/* *— Redaksia ZHURMA*