Pse 'Higjiena Komunale' në Shkup ka borxhe 12 milionë euro?

SHKUP — Enti Shtetëror i Revizionit ka dhënë opinion të pafavorshëm për punën e NP "Higjiena Komunale – Shkup" për vitin 2024, duke konstatuar parregullsi të shumta financiare dhe administrative. Sipas raportit, ndërmarrja ka afro 12 milionë euro borxhe, mbi 2 milionë euro kërkesa me arkëtim të pasigurt dhe pasuri të paevidentuara në vlerë prej rreth 472 mijë eurosh. Gjithashtu, gjatë vitit të kaluar janë angazhuar 354 persona përmes agjencive private, për të cilët janë shpenzuar mbi 3 milionë euro.

Sipas Bota Sot, ndërmarrja ka afro 12 milionë euro borxhe, duke evidentuar edhe probleme serioze në funksionim. Nga 189 automjete komunale, vetëm 76 janë në gjendje funksionale, ndërsa 80 janë të prishura dhe 33 të vjetruara, sipas Telegrafit.

Revizioni ka evidentuar gjithashtu humbje financiare, likuiditet të dobët, llogaritje të parregullta të pagave dhe faktin se 60 përqind e parkut të automjeteve është jashtë funksionit, duke rrezikuar seriozisht cilësinë dhe vazhdimësinë e shërbimeve publike, transmeton Portalb.mk.

Janë konstatuar dobësi në evidentimin e pasurive të paluajtshme dhe objekteve infrastrukturore, nuk është siguruar e drejta e pronësisë dhe nuk është evidentuar pajisja (gjysmërimorkiot) e regjistruar në pronësi të ndërmarrjes publike, me vlerë prej 29.048 mijë denarë, përkatësisht 472.325 euro, sipas raportit.

Revizioni konstatoi parregullsi në mënyrën e llogaritjes së pagës së drejtorit dhe tek puna jashtë orarit e nëpunësve administrativë. Me analizën e kryer e të dhënave të paraqitura në librat tregtarë dhe në pasqyrat financiare, revizioni konstatoi se: Ndërmarrja publike evidenton një raport të pafavorshëm ndërmjet të ardhurave dhe shpenzimeve (nën 1), profitabilitet negativ (humbje), likuiditet të reduktuar, si dhe efikasitet të përkeqësuar të biznesit, i shprehur përmes periudhës së zgjatur të arkëtimit të kërkesave (140 ditë) dhe periudhës së shtuar të pagesës së detyrimeve (108 ditë), thuhet në raport.

— Burim: Portalb, https://portalb.mk/raporti-i-revizionit-ne-higjienen-komunale-12-milione-euro-borxhe-3-milione-euro-per-354-te-angazhuar-dhe-60-e-automjeteve-jashte-funksionit/

— Redaksia ZHURMA