Bordi i Transparencës ndryshon çmimet e karburanteve
Ndryshojnë çmimet e naftës, benzinës dhe gazit në tregun vendas pas vendimit të fundit të Bordit të Transparencës.
Redaksia ZHURMA · · Përditësuar · 1 min lexim
Bordi i Transparencës ka përcaktuar tarifat e reja tavan për tregtimin e hidrokarbureve në vend, ku nafta është rritur me dy lekë duke u bërë 210 lekë për litër në shitjen me pakicë, ndërsa benzina ka rënë në 165 lekë për litër. Çmimet e reja hynë në fuqi në orën 18:30 dhe do të mbeten të vlefshme deri në mbledhjen e radhës të institucionit.
Sipas vendimit të marrë gjatë mbledhjes, gazoili për shitje me shumicë do të tregtohet jo më shumë se 198 lekë për litër, ndërsa benzina me shumicë është caktuar deri në 153 lekë për litër. Për automjetet, gazi u vendos në nivelin e 71 lekëve për litër me pakicë dhe 59 lekë për litër me shumicë, kurse gazoili për sektorin e peshkimit do të kushtojë 114 lekë për litër.
Autoritetet kanë paralajmëruar operatorët ekonomikë se çdo shkelje e konstatuar do të sjellë pezullim të aktivitetit. Ministria e Ekonomisë dhe Inovacionit, ajo e Financave dhe Ministria e Infrastrukturës dhe Energjisë theksuan angazhimin e përbashkët për mbrojtjen e konsumatorëve dhe ruajtjen e konkurrencës së ndershme.
