Pse Blerim Canaj thotë se Albin Kurti dëshiron të ketë gjithçka në dorë?

PRISHTINË — Analisti politik Blerim Canaj ka shprehur shqetësime serioze lidhur me ushtrimin e mandatit të Presidentit të Kosovës dhe ndikimin e pushtetit ekzekutiv mbi institucionet shtetërore. Sipas tij, gjatë viteve të fundit është vërejtur një devijim i qartë nga roli kushtetues që duhet të luajë kreu i shtetit në raport me pushtetet e tjera.

Canaj ka theksuar se ka pasur situata ku presidenca ka hequr dorë nga ushtrimi i plotë i kompetencave të saj kushtetuese. Kjo vërehet veçanërisht në fushën e politikës së jashtme, një dikaster që sipas tij i takon drejtpërdrejt institucionit të presidencës, por që është lënë nën hijen e vendimeve të qeverisë.

Në një deklaratë të dhënë për Klan Kosova, analisti u shpreh skeptik se kryeministri Albin Kurti është i gatshëm të bëjë marrëveshje politike. Sipas Canajt, kreu i qeverisë synon të ketë gjithçka në dorë, duke penguar arritjen e një marrëveshjeje për institucionet dhe duke synuar kapjen e gjyqësorit e prokurorisë përmes presidencës, ku i duhet vetëm një nënshkrim.

Ky raport pesëvjeçar mes presidentes Vjosa Osmani dhe kryeministrit Albin Kurti u cilësua nga Canaj si një "binom politik" me ndikim negativ në funksionimin institucional. Ai u shpreh se Osmani ka luajtur rol në linjë me qeverinë, duke treguar afërsi të madhe me politikat e kryeministrit, veçanërisht kah fundi i mandatit të saj.

Kjo marrëdhënie e ngushtë, sipas analistit, ka bllokuar procese kyçe si mosplotësimi i disa pozicioneve të larta shtetërore, ku si shembull konkret përmendet mungesa e kryeprokurorit. Kjo situatë dëshmon se përqendrimi i pushtetit po dëmton pavarësinë e institucioneve në vend.

Burim: Ekonomia Online
— Redaksia ZHURMA