Bizneset e Kosovës investuan 1.54 miliardë euro në 2025, ndërtimi mori 53.53%

Ndërmarrjet në Kosovë investuan 1.54 miliardë euro gjatë vitit 2025, sipas të dhënave të Agjencisë së Statistikave të Kosovës (ASK). Ndërtimi përbënte 53.53% të investimeve, ndërsa makineri dhe pajisje 35.75%. Rajoni i Prishtinës përqendroi 57.16% të investimeve, ndërsa Gjakova 9.31%. Tregtia me shumicë dhe pakicë ishte sektori më aktiv, me 24.12% të investimeve, e ndjekur nga ndërtimtaria (20.66%) dhe prodhimi (20.37%).

Sipas ASK-së, investimet në asete të prekshme përbënin 7.76%, ndërsa ato në produktet e pronësisë intelektuale 2.95%. Investimet biologjike të kultivuara dhe serrat në bujqësi kishin pjesëmarrje të vogël, vetëm 0.01%.

Financimi kryesor erdhi nga mjetet vetanake të bizneseve (58.22%), ndërsa bankat vendore mbështetën 30% të investimeve. Burimet e tjera kishin pjesëmarrje më të vogël.