Berisha: Leku është kthyer në narkos dhe lavatriçe parash

Kryetari i Partisë Demokratike, Sali Berisha, në një konferencë për mediat ka komentuar rënien e euros, duke u shprehur se leku është kthyer në narkos. Sipas tij, Shqipëria është shndërruar në lavatriçe të parave të drogës mbi tokë.

Berisha deklaroi se leku është monedha më e fortë në botë në raport me euron. «Leku është shndërruar në narkos, nuk do quhet më 5 mijë lekë, por do quhet narkos», u shpreh ai, duke iu referuar një studimi të Eurostat sipas të cilit vendi shpallet de facto lavatriçja e parave të drogës mbi tokë.

Gjatë fjalës së tij, kreu i demokratëve shtoi se paraja e madhe dhe kontejnerët me euro e dollarë vijnë në vend, ndërsa Shqipëria e Edi Ramës rezulton më narko-shtet se çdo vend tjetër. «Narko-trafikun e paguajnë qytetarët shqiptarë», tha Berisha.