Projektligji i ri sjell instrumentin financiar të obligacioneve të mbuluara

Një kuadër i posaçëm ligjor është hartuar bashkërisht nga Autoriteti i Mbikëqyrjes Financiare dhe Banka e Shqipërisë përmes projektligjit që rregullon emetimin dhe mbikëqyrjen e obligacioneve të mbuluara. Nisma synon të sjellë një instrument të ri financiar në tregun vendas, duke krijuar mundësi për financim afatgjatë dhe duke përafruar legjislacionin me standardet e Bashkimit Europian.

Deri më tani, rregullimet ligjore në vend kanë mbuluar titujt e borxhit në përgjithësi, por kanë munguar mekanizmat specifikë për këtë kategori. Projektligji i ri adreson këtë hapësirë duke përcaktuar rregulla për cilësinë dhe administrimin e aktiveve mbuluese, si dhe kërkesat e transparencës për mbrojtjen e investitorëve. Sipas përcaktimeve të nismës, Banka e Shqipërisë ruan kompetencat për mbikëqyrjen prudenciale të institucioneve të kreditit dhe jep opinion paraprak, ndërsa Autoriteti i Mbikëqyrjes Financiare miraton programin dhe ushtron mbikëqyrjen publike të tij.