BE lëshoi 1.1 milionë leje qëndrimi për shqiptarët në 18 vjet
Të dhënat e Eurostat tregojnë se nga 2008-a deri në 2025-n u dhanë rreth 1.1 milionë leje qëndrimi për shtetasit shqiptarë, ndërsa Gjermania arriti rekordin e 124 mijë lejeve.
Vendet e Bashkimit Europian kanë lëshuar rreth 1.1 milionë leje qëndrimi për herë të parë për shtetasit shqiptarë gjatë periudhës 2008-2025. Kjo shifër, e përpunuar nga të dhënat e Eurostat, tregon se emigracioni drejt BE-së ka vijuar me ritme të larta gjatë dekadës së fundit, duke tejkaluar valët e largimeve të dy-tre dekadave më parë.
Në harkun kohor 2008-2016 u dhanë rreth 509.5 mijë leje qëndrimi. Pjesa më e madhe e tyre u përqendrua në vitet 2008-2010, me rreth 70-100 mijë leje në vit, kryesisht në Itali dhe Greqi. Këto dy shtete së bashku mbuluan gati 90 për qind të lejeve për këtë periudhë, me Italinë që zuri 53 për qind dhe Greqinë 37 për qind.
Pas një stabilizimi të pjesshëm pas vitit 2012, një valë e re nisi pas 2016-s. Për periudhën 2017-2025 u lëshuan edhe 573 mijë leje të tjera, duke e tejkaluar dekadën paraardhëse. Gjeografia e pritësve gjithashtu u zgjerua: Italia dhe Greqia dhanë së bashku 62 për qind të lejeve totale për këtë periudhë, përkatësisht 41 për qind dhe 21 për qind.
Gjermania ka dalë në skenë si një destinacion gjithnjë e më i rëndësishëm, duke tërhequr forcë punëtore të kualifikuar. Për periudhën 2017-2025 ajo dha 20 për qind të lejeve. Në total, që nga viti 2008, Gjermania ka lëshuar 124 mijë leje qëndrimi për shtetasit shqiptarë, duke u renditur e treta pas Italisë dhe Greqisë.
Popullsia e Shqipërisë është ulur në 2.3 milionë banorë, nga 3 milionë në vitin 2006, çka e bën ritmin e largimeve edhe më të ndjeshëm në raport me popullsinë.