Bashkia Elbasan: 30 banesa e 20 bodrume të përmbytura, 10 pemë të rrëzuara
Verifikimet paraprake të Bashkisë Elbasan tregojnë për rreth 30 banesa e 20 bodrume të prekura nga uji, dëme në automjete dhe 10 pemë të rrëzuara.
ELBASAN — Verifikimet paraprake të strukturave të Bashkisë Elbasan kanë nxjerrë në dritë një bilanc të prekjes nga stuhia e ditës së djeshme: rreth 30 banesa dhe 20 bodrume kanë marrë ujë, ndërsa 10 pemë janë rrëzuar dhe janë hequr nga rrugët.
Në këto ambiente banimi e bodrume është ndërhyrë me pompa për të nxjerrë ujin dhe për t'i kthyer gradualisht në gjendje normale. Dëmet më të mëdha janë shënuar te automjetet e parkuara në parkimet nëntokësore, ku uji i reshjeve ka depërtuar.
Ekipet e emergjencave dhe të shërbimeve publike kanë dalë menjëherë në terren për të ndihmuar qytetarët dhe për të menaxhuar pasojat. Sipas të dhënave zyrtare të publikuara nga Bashkia, brenda 30 minutave janë regjistruar rreth 60 milimetra reshje shiu, çka solli grumbullime të mëdha uji dhe përmbytje në disa pika të qytetit.
Problemet nuk kanë mbetur vetëm brenda qytetit. Prurjet e krijuara nga reshjet kanë shkaktuar dëmtime dhe vështirësi në disa rrugë të fshatrave dhe njësive administrative, ku mjetet dhe ekipet e shërbimeve publike kanë pastruar materialet e sjella nga uji për të rikthyer qarkullimin në segmentet e prekura.
Fatmirësisht, nuk është raportuar asnjë person i lënduar.