Bardhi: Deklaratat e Ballës ndaj eurodeputetit Gahler janë skandaloze

Kryetari i Grupit Parlamentar të Partisë Demokratike, Gazment Bardhi, ka reaguar ndaj deklaratave të Taulant Ballës drejtuar eurodeputetit gjerman Michael Gahler, duke i cilësuar ato si të papranueshme dhe skandaloze. Sipas Bardhit, gjuha e përdorur ndaj kreut të Delegacionit të Parlamentit Europian për zgjedhjet në Shqipëri dhe koordinatorit të grupit parlamentar të PPE-së përbën një sulm përçmues që duhet dënuar.

Reagimi i Ballës kishte ardhur pasi eurodeputeti gjerman i kishte cilësuar protestat e qytetarëve në Shqipëri si të justifikuara, duke propozuar krijimin e një qeverie teknike për rikthimin e besimit te zgjedhjet e lira dhe të ndershme, si dhe duke ngritur shqetësime për çështjen e imunitetit të Belinda Ballukut. Nga ana e tij, Balla kishte deklaruar se nuk i merrte në konsideratë qëndrimet e Gahlerit, duke i krahasuar ato me deklaratat e deputetes demokrate Albana Vokshi.

Bardhi thekson se apeli i eurodeputetit nuk përbën një qëndrim individual, por përputhet me shqetësimet e shprehura në Rezolutën e Parlamentit Europian të vitit 2025. Ai shton se garantimi i zgjedhjeve të lira dhe lufta kundër korrupsionit e krimit të organizuar mbeten kushte themelore për përparimin e vendit drejt Bashkimit Europian. «Askush nuk mund ta intimidojë apo ta delegjitimojë zërin e përfaqësuesve europianë që kërkojnë standarde demokratike dhe zgjedhje sipas parimeve dhe vlerave të Bashkimit Europian», përfundon Bardhi.