Barcelona nis kontaktet për transferimin e Rodrit
Mesfushori i Manchester Cityt është në shënjestër edhe të Real Madridit, që e ka ndjekur gjatë gjithë verës.
BARCELONA — Barcelona ka nisur kontaktet me kampin e Rodrit për një transferim të mundshëm, sipas raportimeve të gazetarit Mario Cortegana të The Athletic. Klubi katalanas po kërkon të mësojë mundësinë e një lëvizjeje të mesfushorit spanjoll gjatë kësaj vere.
Projekti i Barcelonës thuhet se i pëlqen shumë mesfushorit, sidomos filozofia e lojës: stili i pasimeve, kontrolli i topit dhe roli qendror i mesfushës në sistemin katalanas konsiderohen faktorë që mund ta bindin atë për lëvizje drejt “Camp Nou”. Një tjetër element është ambienti i njohur për të.
Nëse transferimi realizohet, Rodri do të gjente te Barcelona shokë nga kombëtarja spanjolle, me të cilët ka ndarë suksesin ndërkombëtar. Por katalanasit nuk janë të vetmit në garë: Real Madridi e ka ndjekur gjatë gjithë verës dhe e sheh si profil ideal për të udhëhequr mesfushën në vitet e ardhshme.
Rodri, fitues i Topit të Artë, është aktualisht pjesë e Manchester Cityt dhe mbetet një nga mesfushorët më të kompletuar në futbollin modern. Marrëveshje konkrete nuk ka ende, por interesi i dy gjigantëve të La Ligës e bën të ardhmen e tij historinë më të nxehtë të merkatos.
Burim: Top Channel
— Redaksia ZHURMA