ProCredit, TEB dhe NLB ulin tarifat — sa e prek kjo xhepin e qytetarit?

PRISHTINË — ProCredit Bank, TEB Bank dhe NLB Bank kanë publikuar çmimore të reja që përfshijnë ulje tarifash për llogari, pagesa, kartela bankare dhe shërbime të tjera financiare. Disa nga këto ndryshime kanë hyrë në fuqi që nga pjesa e parë e vitit, të tjera nga muaji qershor. Në një përgjigje me shkrim për Ekonomia Online, Banka Qendrore e Kosovës (BQK) ka theksuar se tarifat bankare përcaktohen nga vetë bankat sipas metodologjive të tyre, të nënshtruara aspektit të praktikave të mbikëqyrjes së BQK-së, ndërsa transparenca, shpalosja dhe aspekte të tjera janë nën monitorim.

BQK sqaron se zhvillimet e fundit nuk tregojnë një fenomen të përgjithshëm të rritjes së tarifave, por raste individuale të ndryshimeve të çmimeve, të shoqëruara edhe me ulje nga të paktën tri banka. "Pra, nuk kemi fenomen të quajtur të rritjes së tarifave, por raste individuale dhe në konkurrencë, krahas rasteve të uljes së tarifave, e disa prej bankave nuk i kanë ndryshuar ose vetëm i kanë përshtatur," thotë BQK-ja. Institucioni mbikëqyrës nënvizon se qytetarët tashmë kanë më shumë mundësi zgjedhjeje, jo vetëm ndërmjet bankave, por edhe përmes institucioneve financiare jobankare (IFJB) dhe ofruesve të shërbimeve të pagesave elektronike, të cilat kanë zgjeruar gamën e produkteve dhe ofruar alternativa më konkurruese.

Me qëllim të rritjes së transparencës dhe informimit të konsumatorëve, BQK ka miratuar rregulloren dhe ka vënë në funksion Platformën për Krahasimin e Produkteve dhe Shërbimeve Financiare: krahaso.bqk-kos.org. Kjo platformë u mundëson qytetarëve të krahasojnë në mënyrë të lehtë produktet, shërbimet dhe tarifat e institucioneve financiare, duke i ndihmuar ata të marrin vendime më të informuara dhe më të favorshme për nevojat e tyre financiare. Iniciativat e BQK-së synojnë rritjen e konkurrencës, lehtësimin e qasjes në Llogarinë e Pagesës me Shërbime Bazike, si dhe fuqizimin e mbrojtjes së konsumatorëve dhe rritjen e përfshirjes financiare.

Përveç kësaj, BQK ka avancuar mbikëqyrjen në aspektin e metodologjive të vendosjes dhe shpalosjes së çmimeve përmes një strukture veçantë mbikëqyrëse, ndërsa është në fazën përfundimtare të miratimit të një kornize të re rregullative të avancuar. Kjo kornizë do të përcaktojë mënyrën e njoftimit, shpalosjes, publikimit dhe transparencës së produkteve ndaj publikut, duke kontribuar më tej në këto objektiva. Zhvillimet e fundit po shihen si tregues i një tregu gjithnjë e më konkurrues, ku fokusi po zhvendoset drejt ofrimit të shërbimeve më të përballueshme, më transparente dhe më të përshtatura me nevojat e qytetarëve dhe bizneseve.

Burim: IndeksOnline
— Redaksia ZHURMA