AUV-ja zbulon 20% të produkteve të qumështit me vaj palme të padeklaruar

PRISHTINË — Agjencia e Ushqimit dhe Veterinarisë (AUV) gjeti mospërputhje në rreth 20 për qind të mostrave të produkteve të qumështit të analizuara në Kosovë gjatë një kontrolli të zgjeruar që zgjati rreth tre muaj. Shumica e mospërputhjeve kishin të bënin me praninë e vajit të palmës pa deklarim në etiketë.

Në total u morën 495 mostra për analiza laboratorike, ku u testuan përmbajtja e yndyrës, proteinës, prania e vajit të palmës, niseshtes e qumështit pluhur. Nga 93 mospërputhje, 46 raste lidhen me vajin e palmës, ndërsa 8 për qind përfshinin përbërës të deklaruar por të padetektuar.

Kryeshefi i AUV-së, Bekim Hoxha, konfirmoi në konferencën e përbashkët me Ministrinë e Bujqësisë, të martën, se kontrolli kishte qëllim "verifikimin e sigurisë ushqimore dhe autenticitetit të produkteve". Ai shtoi se rezultatet nuk duhet të interpretohen si tregues se tregu i qumështit është i pasigurt.

Ministri i Bujqësisë, Armend Muja, paralajmëroi "masa proporcionale" për shkeljet e gjetura. "Qumështi i fermerëve tonë është qumësht që e teston AUV-ja, është cilësi që e garantojmë përmes kontrollit", deklaroi Muja, duke shtuar se nga e mërkura do të nxirret vendim për zbatimin e ligjit.

Inspektorët e AUV-së më 2 korrik kryen kontrolle në fabrikën Vita në Istog, ku morën mostra të qumështit me afat të gjatë përdorimi, qumështit pluhur dhe vajit të palmës për analiza laboratorike. Teksa priteshin rezultatet, kompania pezulloi përkohësisht punën, duke çuar në përplasje me drejtuesit e kompanisë dhe ministrinë.

Në listën e prezantuar në konferencë, mostrat e Abrazen — kompania amë e Qumështores Vita — treguan se në një mostër "qumësht" vaji i palmës u gjet por nuk ishte i deklaruar. Muja u përgjigj pyetjes së gazetarëve: "Pa fije dyshimi", duke konfirmuar se qumështorja ka plasuar në treg produkte me vaj palme.

Deri më tani, as Abrazen as Qumështorja Vita nuk kanë reaguar publikisht ndaj rezultateve. Radio Evropa e Lirë ka bërë kërkesë për koment dhe po në pritje të përgjigjeve. AUV-ja nuk e ka bërë të qartë se te cilat kompani u bë testimi, megjithëse prezantoi një listë me 38 mostra me mospërputhje.

Burim: Shqiptarja
— Redaksia ZHURMA