Protesta kundër Speciales, thirrje për tubim në Prishtinë dhe Këln

Organizata e Veteranëve të Luftës së Ushtrisë Çlirimtare të Kosovës (OVL-UÇK) ka bërë thirrje për një protestë gjithëpopullore në Prishtinë, pas aktgjykimit ndaj katër ish-krerëve të UÇK-së në Hagë. Tubimi do të nisë në sheshin “Skënderbeu” dhe sipas organizatës do të jetë paqësor.

Ndërkohë, rinia shqiptare në Gjermani ka paralajmëruar një protestë të shtunën në Koln HBF, me mesazhin “Jo në emrin tim!”. Organizatorët u bëjnë thirrje të rinjve shqiptarë që t’i bashkohen tubimit.

Në protestën në Prishtinë, mes protestuesve janë parë edhe Endrit Thaçi, djali i ish-presidentit Hashim Thaçi, dhe Klestor Veseli, djali i Kadri Veselit. Endriti mbante një bluzë me simbolin historik të UÇK-së, ndërsa Klestori një bluzë me mbishkrimin “Liria ka Emër”.

Gazmend Syla i OVL-UÇK-së tha se protesta është paqësore dhe pa maska, duke shtuar se “dje u dënua lufta jonë për çlirim”.