Çfarë sjell autostrada Milot–Balldren me 365 milionë euro?
Projekti 17 km parashikon tunel 850-metrësh me dy tuba për anashkalimin e Lezhës, me investim 365 milionë euro nëpërmjet PPP me koncesion 35-vjeçar.
TIRANË — Autostrada Milot–Balldren do të ndërtohet në një korridor tërësisht të ri, rreth 17 kilometra, për të zgjidhur problematikat e trafikut në njërin nga akseset më të ngarkuara të vendit. "Kjo do të jetë një autostradë e kategorisë A, cilësia më e lartë e rrugëve të standardit europian, me nga dy korsi qarkullimi dhe korsi emergjence në secilin drejtim", bën të ditur Ministria e Infrastrukturës dhe Energjisë (MIE).
Vepra qendrore inxhinierike është tuneli modern me dy tuba, secili 850 metra, i cili do të anashkalojë qytetin e Lezhës. Tuneli do të ndërtohet mes Urës së Drinit dhe Balldrenit — zonë ku aktualisht nuk ekziston infrastrukturë rrugore — duke mundësuar qarkullim më të shpejtë dhe më të sigurt.
Projekti përfshin po ashtu ura, nyja lidhëse, rrugë shërbimi, sisteme inteligjente të menaxhimit të trafikut dhe infrastrukturë tarifimi. Rruga ekzistuese Milot–Lezhë–Balldren do të vijojë si alternativë lokale, ndërsa autostrada e re do të lidhë veriun e Shqipërisë me rrjetin rajonal dhe korridoret europiane.
Investimi llogaritet rreth 365 milionë euro dhe do të realizohet nëpërmjet modelit Partneritet Publik-Privat (PPP), me periudhë koncesionare 35-vjeçare. Gjatë kësaj periudhe, koncesionari do të jetë përgjegjës për ndërtimin, operimin dhe mirëmbajtjen e autostradës.
Burim: ATSH
— Redaksia ZHURMA