Pse paguajnë dy herë autoshkollat e Prishtinës qiranë e poligonit?

PRISHTINË — Autoshkollat në kryeqytet po ankohen se detyrohen të paguajnë dy herë për shfrytëzimin e poligonit të testimit praktik për kandidatët e patent shoferit, pavarësisht se Ministria e Infrastrukturës thotë se ka marrëveshje me Stacionin e Autobusëve për përdorimin e hapësirës.

Përfaqësuesit e tyre e cilësojnë këtë si kosto shtesë të panevojshme. Arian Sylejmani, një nga përfaqësuesit, thotë se qira po paguhet dy herë: "Na e paguajmë dy herë një qira ku kandidati kur e paraqet pjesën praktike e paguan një shumë prej 10 euro." Sipas tij, në bazë të numrit të autoshkollave brenda muajit, pagesa arrin 7 mijë euro vetëm për stacionin e autobusëve.

Lavdim Hamiti thekson se kjo është "kosto shtesë e palogjikshme", pasi ministria paguan qira për poligonin dhe njëkohësisht i obligon autoshkollat të vijnë aty për testimin e kandidatëve. Sipas tij, secila veturë ka kosto 20 euro për shfrytëzim poligoni.

Nga Ministria e Infrastrukturës kanë thënë se kanë marrëveshje të lidhur për shfrytëzimin e hapësirës, por se çështjet kontraktore ndërmjet autoshkollave dhe Stacionit të Autobusëve janë "të rregulluara drejtpërdrejt ndërmjet palëve përkatëse."

Veton Prelvukaj, kryeshef i Stacionit të Autobusëve, mohon pagesën e dyfishtë. Ai thotë se kontrata me ministrinë përfshin 1,000 metra katrorë zyrash për testimin me shkrim dhe poligonin praktik, ndërsa me autoshkollat ka kontrata të veçanta parkimi — 20 euro në muaj ose 64 cent në ditë për ata që lidhin kontratë, ose tarifë parkimi si çdo qytetar për të tjerët. "Nuk bëhet fjalë që paguhet dy herë i njëjti shërbim," thotë ai.

Autoshkollat janë ankuar edhe për kushte jo të mira në hapësirë; Prelvukaj premton rinovim përmes planit të biznesit të aprovuar.

Burim: Zëri
— Redaksia ZHURMA