Çfarë ndalon ARSHU për keqpërdorimin e ujit të pijshëm gjatë verës?
Vendimi i ARSHU-së ndalon ujitjen e rrugëve, larjen e makinave dhe mbushjen e pishinave me ujë të pijshëm nga sistemi publik.
PRISHTINË — Autoriteti Rregullator për Shërbimet e Ujit ka nxjerrë vendim për ndalimin e përdorimit të ujit të pijshëm nga sistemi publik për qëllime jothemelore gjatë sezonit veror.
Sipas vendimit, ndalohet përdorimi i ujit të pijshëm për ujitjen e rrugëve, trotuareve dhe sipërfaqeve të tjera publike apo private, larjen e automjeteve, ujitjen e kopshteve, livadheve dhe tokave bujqësore, mbushjen e pishinave, si dhe çdo përdorim tjetër që nuk ka për qëllim nevojat themelore të konsumit njerëzor.
ARSHU-ja obligon ofruesit e shërbimeve të ujit të monitorojnë në terren, të identifikojnë rastet e keqpërdorimit dhe të ndërmarrin masa për reduktimin e furnizimit me ujë në rastet e shkeljes. Në arsyetimin e vendimit thuhet se gjatë verës konsumi i ujit rritet, ndërsa një pjesë e konsiderueshme përdoret për qëllime jothemelore, duke zvogëluar kapacitetet furnizuese dhe rrezikuar furnizimin e qëndrueshëm.
Vendimi ka hyrë në fuqi më 1 qershor 2026 dhe do të zbatohet deri më 31 tetor 2026.
Burim: Zëri
— Redaksia ZHURMA