Autoritetet shqyrtojnë gërmimet e varrezës masive të tretë në Zubin Potok
Të dielën u gjetën mbetjet e së paku katër personave në lokacionin Jabukë të Zubin Potokut.
ZUBIN POTOK — Lokacioni i tretë i mundshëm i një varreze masive të luftës së viteve 1998-1999 në Zubin Potok ka tërhequr vëmendjen e mediave ndërkombëtare. Al Jazeera, duke cituar AFP dhe Anadolu, raporton se autoritetet në Kosovë po shqyrtojnë nisjen e gërmimeve në lokacionin e tretë, pas zbulimit të mbetjeve mortore në lokacionin e dytë të hënën.
Për zhvillimet kanë raportuar edhe mediat italiane. Agjencia e lajmeve ANSA shkruan se të dielën u gjetën mbetjet e së paku katër personave, që besohet se janë viktima të luftës, në një varrezë masive në lokacionin Jabukë të Zubin Potokut, në veri të Kosovës.
Euronews Italia thekson se vëmendja e hetuesve është përqendruar te fati i të ashtuquajturit "grupi i intelektualëve", i përbërë nga 23 civilë shqiptarë nga Mitrovica. Sipas autoriteteve, grupi u rrëmbye më 19 prill 1999, ndërsa udhëtonte me autobus drejt Malit të Zi; burrat u nxorën me forcë nga autobusi, u morën dhe më pas u vranë.
Burim: Ekonomia Online
— Redaksia ZHURMA