Prokuroria e Kosovës heton vendin e tretë për varrezë masive në Zubin Potok

PRISHTINË — Prokuroria Speciale e Kosovës tha se po kryhen hetime për një lokacion të tretë për varrezë masive, teksa në dy lokacione në Zubin Potok autoritetet kanë konfirmuar gjetjen e mbetjeve mortore, që dyshohet se u përkasin viktimave të luftës së fundit në Kosovë.

Në fshatin Jabukë të Zubin Potokut “janë gjetur mbetje”, të cilat sipas Prokurorisë do t’i nënshtrohen ekzaminimeve mjeko-ligjore dhe analizave të ADN-së për identifikim, ndërsa gërmimet në fshatin Kalludër e Vogël po vazhdojnë.

“Aktualisht hetimet po vazhdojnë në një lokacion të tretë”, tha Prokuroria Speciale, e cila shtoi se hetimet për krimet e luftës në Zubin Potok po vazhdojnë në mënyrë intensive. Gërmimet për varrezën e dyshuar masive nisën në fund të korrikut.

Ndërkaq, ministri në detyrë i Punëve të Brendshme, Xhelal Sveçla, tha më 3 gusht se në Jabukë janë zbuluar mbetjet mortore të të paktën katër personave. Më herët, Prokuroria Speciale konfirmoi gjetjen e mbetjeve me origjinë njerëzore edhe në Kalludër e Vogël.

Njoftimi vjen kur kryenegociatori i Kosovës për dialogun teknik, Agron Bajrami, ka kërkuar që Bashkimi Evropian të sigurohet që Serbia të zbatojë plotësisht zotimet e Deklaratës për Personat e Zhdukur. Bajrami tha se i ka përcjellë shqetësimet e-dërguarit të posaçëm të BE-së për dialogun, Peter Sorensen.

Deklarata për të Zhdukurit, arritur më 2 maj 2023, parasheh zbardhjen e fatit të mbi 1.500 personave të zhdukur gjatë luftës më 1998-99. Lidhur me dyshimet për varreza masive, autoritetet në Kosovë kanë arrestuar tre persona, ndërsa në Serbi më 30 korrik u arrestua një person për spiunazh.

Kryeministri në detyrë, Albin Kurti, ka përsëritur thirrjen që Serbia të hapë arkivat shtetërore e ushtarake dhe të zbatojë Deklaratën e Brukselit. Instituti i Krimeve të Kryera Gjatë Luftës ka dokumentuar 12.230 viktima, nga të cilët mbi 1.500 konsiderohen ende të zhdukur.

Burim: BalkanWeb
— Redaksia ZHURMA