Ku dështoi Prishtina në menaxhimin e mbeturinave sipas auditorit?
Vlora Spanca raporton dështim në pothuajse të gjitha hallkat e mbikëqyrjes institucionale për pastrimin e kryeqytetit.
PRISHTINË — Auditorja e Përgjithshme, Vlora Spanca, ka deklaruar se Komuna e Prishtinës nuk ka arritur të jetë as efikase dhe as efektive në grumbullimin e mbeturinave, ndërsa një nga gjetjet më shqetësuese të auditimit ka qenë dështimi i pothuajse të gjitha hallkave të mbikëqyrjes institucionale.
Në konferencën për media ku u shpalos Plani Vjetor Auditues 2025/26, Spanca tha se Zyra Kombëtare e Auditimit ka kryer auditim të performancës për menaxhimin e mbeturinave në kryeqytet, për shkak të interesit publik dhe situatës së krijuar në Prishtinë.
Spanca tha se bordi i KRM “Pastrimi” nuk ka ushtruar mbikëqyrje efektive ndaj kompanisë dhe nuk është marrë me problemet kryesore të mbeturinave në qytet. Ajo shtoi se numri i kamionëve aktivë për mbledhjen e mbeturinave ka rënë vazhdimisht dhe se kompania nuk ka realizuar planet investive për zëvendësimin e tyre.
Sipas saj, edhe kamionët e rinj të blerë nga Komuna janë dorëzuar me vonesa dhe nuk janë vënë menjëherë në funksion. Spanca deklaroi se qindra kontejnerë të blerë nga Komuna kanë mbetur të papërdorur, ndërsa shumë të tjerë janë dëmtuar për shkak të mungesës së njohurive të stafit.
Burim: Koha.net
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr në llogarinë tënde për me e thanë mendimin.