Auditimi në Trepçë shfaq parregullsi milionëshe me stoqet dhe pasuritë

Komisioni për Mbikëqyrjen e Financave Publike ka shqyrtuar raportin e auditimit për ndërmarrjen Trepça për vitin 2025, ku janë evidentuar pasuri prej mbi 42 milionë eurosh pa dokumentacion të mjaftueshëm dhe pasiguri mbi stoqet prej më shumë se 23 milionë eurosh. Në këtë mbledhje u ngritën shqetësime për saktësinë e raportimit financiar dhe përgjegjësinë e drejtuesve.

Raporti i auditimit për vitin 2025 nxjerr në pah se ndërmarrja publike ka pasur mangësi në evidenca dhe mbivlerësim të llogarive të arkëtueshme për qindra mijëra euro, duke krijuar rrezik për shtrembërim material të rezultateve financiare. Këto gjetje u prezantuan gjatë diskutimit me bordin dhe menaxhmentin e ndërmarrjes.

Kryetari i Komisionit për Mbikëqyrjen e Financave Publike, Besian Mustafa, tha se numri i madh i të gjeturave ngre shqetësime serioze për saktësinë e raportimit financiar. Mustafa bëri të ditur se ndërmarrja nuk ka ofruar dëshmi të mjaftueshme për metodologjinë e përdorur në vlerësimin e stoqeve prej 23 milionë e 187 mijë euro. Ai shtoi se pasqyrat paraqesin mbivlerësim të llogarive të arkëtueshme për 376 mijë e 245 euro, si dhe mungon dokumentacioni për pasuri prej 42 milionë e 755 mijë e 994 euro.

Nga ana e tij, kryetari i Bordit të Trepçës, Shpëtim Dobra, bëri të ditur se pesë rekomandime janë zbatuar plotësisht, katër janë zbatuar pjesërisht, ndërsa 27 të tjera mbeten në proces zbatimi. Dobra tha se menaxhmenti ka krijuar komisione dhe ka hartuar procedura të brendshme për përmirësimin e evidencave.

Kryeshefi ekzekutiv i Trepçës, Faton Ahmeti, deklaroi se një pjesë e të gjeturave lidhen me konsolidimin e pasqyrave financiare që përfshijnë njësitë në jug dhe veri të Mitrovicës, proces që sipas tij është kryer për herë të parë në vitin 2024. Ahmeti sqaroi se nga gjetjet e reja, katër prej tyre i përkasin njësisë në Leposaviq. Megjithatë, deputeti Eman Rrahmani reagoi ndaj këtij prezantimi, duke kërkuar sqarime lidhur me kontrollin dhe përgjegjësinë e menaxhmentit për njësinë në veri.

Menaxhmenti i Trepçës ka përcaktuar fundin e vitit 2026 si afat për zbatimin e plotë të rekomandimeve të mbetura nga raporti i auditimit.

«Nuk pasqyron drejtë realitetin financiar të ndërmarrës suaj. Ka aq shumë gjetje saqë kam frikën se do mbesim shumë gjatë», deklaroi kryetari i komisionit Besian Mustafa gjatë mbledhjes.

«Është hera e parë që në vitin 2024 kemi bë konsolidimin e pasqyrave financiare, që më herët nuk ka ndodhur asnjëherë dhe kjo ka qenë problematik që ka shfaqur gjetjet në këtë nivel», tha kryeshefi ekzekutiv Faton Ahmeti.