Pushteti kërkon opozitë të heshtur, kritika ndaj LVV
Aktivisti politik thotë se PDK-ja dhe Aleanca duhet të dinamizojnë veprimin politik, ndërsa shpreh kritika të ashpra për LDK-në.
PRISHTINË — Pushteti i udhëhequr nga Lëvizja Vetëvendosje nuk e dëshiron një opozitë aktive dhe të gatshme për veprim politik, sipas aktivistit politik Arton Muhaxheri. Reagimet e zyrtarëve të pushtetit ndaj aksionit të deputetes së Aleancës, Time Kadrijaj, dëshmojnë se qeveria synon një opozitë të heshtur dhe pa lëvizje.
Në një shkrim të publikuar në rrjetet sociale, Muhaxheri ka vlerësuar se opozita duhet të kalojë kufijtë e deklaratave të zakonshme institucionale. Ai ka kërkuar shfrytëzimin e çdo forme demokratike të kundërshtimit, duke theksuar se ekziston ende shpresë te Partia Demokratike e Kosovës dhe Aleanca për Ardhmërinë e Kosovës për një kthesë në skenën politike.
Në këtë linjë, aktivisti ka shprehur qëndrime më kritike ndaj Lidhjes Demokratike të Kosovës, duke theksuar se te kjo e fundit nuk sheh pritshmëri për ndryshim. Sipas tij, sfidimi i qeverisë kërkon organizim të mirëfilltë dhe aksion në terren, e jo vetëm reagime përmes komenteve online.
Burim: Ekonomia Online
— Redaksia ZHURMA
